DEGMADA DHARKAYNLAY OO XALAY LAGU WEERARAY TALIYE CIIDAN.

Kooxo hubeysan ayaa xalay weerar ku qaaday guri uu degmada Dharkeynley ka deggan yahay taliye ku xigeenka ciidanka saldhigga degmada Dharkeynley.

Abaaro 3:30-kii habeenimo ee xalay ayaa kooxo hubeysan ay weerar ku qaadeen guriga taliye ku xigeenka oo la yiraahdo Cali Yare, waxaana markaa kadib uu iska horimaad dhexmaray ilaalada taliye xigeenka iyo kooxhii weerarka soo qaaday.

Inta la hubo 4-kamid ah ilaaladii taliye xigeenka ayaa ku dhintay dagaalka, iyadoo sidoo kale uu jiro khasaare ka dhashay dagaalka.

Lama oga cidda rasmiyan ay yihiin kooxo hubeysan ee weerarka ku qaaday taliye ku xigeenka saldhigga degmada Dharkeynley, hase ahaatee weerarka ayaa kamid ah mid badanaa si joogta ah uga dhaca magaalada Muqdisho.

Wax war ah kama soo bixin maamulka degmada Dharkeyley iyo taliye ku xigeenka oo la xiriira weerarka.

Ma ahan markii ugu horeysay oo sargaal katirsan ciidanka dowladda lagu weeraro guri uu ka deggan yahay magaalada Muqdisho.

MAXAABIIS KABADAN 35 QOF OO LAKEENAY MAXKAMADA MAGAALADA JIGJIGA.

Waxaa maanta dacwadoodu Maxkamadda Jigjiga ka socotay Maxaabiis tiro ahaan gaadhaya ilaa 35 Maxbuus kuwaas oo lagu waday baabuurka weyn ee badanaa Maxaabiista lagu qaado, Maxaabiistan ayaa dhammaantood u badnaa Rag dhalinyaro ah oo muddooyin badan ku xidhnaa Xabsiga weyn ee magaalada jigjiga.

Haddaba Ciidamada Guumaysiga oo aad u ilaalinayay Maxaabiistan ayaa waxay xidheen jidka laamida ah ee agmara Maxkamadda iyadoo socodkuna uu yaraa wakhtigaas, Maxkamaddan oo ahayd mid albaabadu u xidhnaayeen isla markaana aan la oggolayn in la galo ayaan wali la xaqiijin wararka rasmiga ah ee ka soo baxay arrinka Maxaabiistaas.

Si kastaba ha ahaatee Guumaysigu waxaa uu xabsiyadiisa ka buuxiyay Shacab aad u tiro badan oo dhammaantood kuwada xidhan xaq daro haddii aad Xabsiyada Jigjiga qaarkood aad tagtana waabad naxaysaa, dadka la la'yahay waxay ku jiraan un Xabsiyada, iyadoo dadku markay muddooyin dhaadheer ku jiraan Xabsiyada xilli dambe kii uu Ilaahay uga nixiyo Cadawga ay markaa Maxkamad keenaan balse Maxkamadda laftigeedu aysan ahayn mid Sharci ah oo ay tahay mid Guumaysiga la shaqaynaysa.

HABEENKII LABAAD OO BAYDHABO GUDAHEEDA LAGU WEERARAY QAAR KAMID AH XUBNAHA BAARLAMAANKA.

Xalay fiidkii ayaa waxa weerar Bambaano lagu qaaday Hoyga xubin ka mid ah Baarlamaanka DFKMG ah ee la shaqeeya Gumeysiga Itoobiya oo lagu magacaabo Max’ed Xuseen Raage xili uu ku sugnaa Magaalada Baydhabo Xarunta Gobolka Baay.

Weerarkan ayaa la xaqiijiyay in ay ku geeriyoodeen 2 will oo mid ka mid ahi uu dhalay ninka laweeraray, iyada la sheegayo in ay jiraan dad kale oo ku dhaawacmay weerarkaasi oo ku sugnaa hoyga la weeraray.

Lama garanayo illaa iyo hadda cidda weerarkaasi qaaday, balse waxa ay ka mid yihiin weerarada Joogtada ah ee Baryihii ugu danbeeyay lagula beegsanayay Xubnaha ka midka ah Baarlamaanka DFKMG ah ee la shaqeeya Gumeysiga Itoobiya.

Weerarkan waxa uu ku soo beegmayaa iyada oo habeen hore sidan oo kale weerar Bambaano lagu qaaday hoy ay ku sugnaayeen Cusmaan cali caato iyo Dalxa xili ay iyaguna ku sugnaayeen Baydhabo.

Lama kala sheegi karo illaa iyo hadda in ay weeraradani xiriir la leeyihiin khilaafka ka aloosan Baydhabo ee la xiriira C/laahi Yuusuf iyo Nuur Cadde iyo in kale.

Magaalada Baydhabo oo ah Magaalada kaliya ee ay sida rasmiga ah uga taliso DFKMG ah ee la shaqeysa Gumeysiga Itoobiya ayaa waxa uu amaankeeda noqday Bilihii ugu danbeeyay mid fara ka baxay.

DAGAAL XOOGAN OO SAAKA KADHACAY MAGAALADA MUQDISHO.

Dagaal xooggan ayaa saaka ka dhacay qeybo kamid ah wadada warshadaha gaar ahaan xarumaha Gaashaandhigga, Kuliyaddii Jaalle Siyaad iyo guryihii Saraakiisha oo inuba fariisin u ah ciidamada dowladda KMG ah iyo kuwa Itoobiya.

Dagaalka oo ahaa mid xooggan ayaa dhacay kadib markii xoogagga dagaalka kula jiar ciidamada dowladda iyo kuwa Itoobiya ay weerar ku qaadeen fariisimahaas, iyadoo labada dhinac ay isweydaarsadeen hubka nuucyadiisa kala duwan.

Madaafiic aan loo meel dayin oo ay ridayeen ciidamada Itoobiya ayaa ku dhacay qeybo kamid ah xaafadaha muqdisho kuwaas oo inta la ogyahay ay ku waxyeeloobeen 5-qof oo rayid ah.

Ma cadda khasaaraha kala gaaray dhinacyadii dagaalamay, waxaana ilo wareed la helay ay sheegayaan inuu jiro khasaare ka dhashay dagaalka oo kala gaaray labada dhinac inkasta oo aan warkaas jiritaankiisa si dhab ah loo xaqiijin karin.

Dagaalka saaka ka dhacay deegaanadaas ayaa ku soo beegmaya xilli aroornimadii shalay dagaal uu ka dhacay isla qeybo kamid ah wadada warshadaha kaas oo u dhexeeyey xoogagga hubeysan iyo ciidamada dowladda.