War Degdeg ah: Cabdikariin Qalinle oo ay Ciidamada Guumaysiga Itoobiya ku xidheen magaalada Jigjiga.

Ciidamada Guumaysiga ee jooga magaalada Jigjiga ayaa waxay xidheen Cabdikariin Qalinle xilli uu ku sugnaa magaalada Jigjiga, iyada oo sida wararku sheegayaan lala xidhay dhawr dhalin yar ah oo ku nool magaalada Jigjiga, lamana garanayo sababta loo xidhay C/kariin iyo Wiilashaas.

Ehelada iyo Qaraabada C/kariin Qalinle ayaa walwal badan ka muujiyay xadhiga C/kariin iyadoo waayadan dambe xadhigu ku soo badanayay magaalada Jigjiga oo Shacabka aad loo xidhxidhayay iyadoo aysan jirin wax sabab cad ah oo lagu xidhayo dadkan. Cabdikariin Qalinle ayaa isagu ahaa nin aad looga yaqaano magaalada Jigjiga iyadoo waayadii hore Xilal kala duwan ka soo hayn jiray Maamulka Kililka balse waayadii dambe iskaga tagay iyadoo in badan la xidhay C/kariin balse in muddo ahba waxaa uu ahaa nin banaankiisa iska jooga siyaasadna aan wax shaqo ah ku lahayn.

Haddaba Warkan oo hordhac ah ayaa Faahfaahintiisa gadaal idinkaga soo gudbin doonaa Inshaa Allaah

Ciidamada Daba Qoodhiga ee ka hoos shaqeeya Ciidamada Gumaysiga Itoobiya Gabadh ku dilay Tuulada Barataale.

Ciidamada dabaqoodhiga loo yaqaano ee caanka ku ah dhibaataynta shacabka s/galbeed ee ka hoos shaqeeya ciidamada gumaysiga Itoobiya ayaa gabadh ku dilay tuulada Barataale ee gobolka wardheer ee wadanka s/galbeed.

Gabadhan oo lagu magacaabo khadra Siraad Fara qodax ayay ciidamadaasi dileen maalintii Axadda ee lasoo dhaafay oo ku aadanayd 13/7/08, Gabadhan ayaa lagu aasay xabaalaha kuyaala tuuladaas iyadoo ay aad uga xumaadeen shacabka ku dhaqan degaankaas.

Gabadhan ayay ciidamada dilay ee dabaqoodhiga ahi u adeegsadeen rasaas ay madaxa kala dhaceen, iyagoo ku eedeeyay gabadha in ay taageerto ururada u dagaalamaya xoraynta wadanka s/galbeed.

Dhibaatada lagu hayo shacabka s/galbeed gaar ahaan dadka biri magaydada ah ayaa ah mid aad usii badanaysa, oo aanay jirin wax kahadlaya ama ka danqanaya.

Email:Webmastar@soomaaligalbeed.com